Vinnuskólinn er byrjaður þetta sumarið.  Sem fyrr fá krakkarnir okkar tækifæri til að vinna fjölbreytt verkefni og reyna sig þannig í raunverulegu atvinnuumhverfi.  Umsjón með vinnuskólanum er á herðum Tómstunda- og íþróttafulltrúa, en í náinni samvinnu við yfirmenn Áhaldahúss og aðra innan Strandabyggðar.

 

Með þessum pósti viljum við segja íbúum frá því að nú megi búast við að sjá krakkana í hinum ýmsu störfum út um allan bæ næstu vikurnar, en líka bjóða ykkur að óska eftir þjónustu krakka úr vinnuskólanum, t.d. við snyrtingu garða, fjarlægja rusl eða önnur léttari viðvik sem ykkur kann að detta í hug.  Vinnuskólinn er nefnilega líka hugsaður sem viss þjónusta  við íbúa.

 

Allar frekari upplýsingar veitir Aðalbjörg S. Sigurvaldadóttir í síma: 696-7046.

 

Áfram Strandabyggð!

 

Þann 1. júlí nk. tekur Hrafnhildur Skúladóttir tímabundið við starfi Forstöðumanns íþróttamannvirkja. Á sama tíma fer Birna Karen í fæðingarorlof í ár. Hrafnhildur hefur áður sinnt starfi forstöðumanns íþróttamannvirkja og er því vel hnútum kunnug.

Um leið og við bjóðum Hrafnhildi velkomna til starfa óskum við Birnu Karen góðs gengis í komandi verkefnum.

Strandabyggð styrkir árlega fjölmörg félagasamtök og hópa, og má þar nefna;  Galdrasafnið, Sauðfjársetur á Ströndum, Leikfélag Hólmavíkur, Héraðssamband Strandamanna, Skíðafélag Strandamanna, Golfklúbb Hólmavíkur, Ungmennafélagið Geislann, Félag eldri borgara, Björgunarsveitina Dagrenningu og Lions. 

Gengið var frá samingum í dag og að þessu sinni var ákveðið að breyta útaf vananum og fá alla styrkþega saman til að skrifa undir, spjalla, njóta léttra veitinga og eiga góða stund. Það tókst vel og verður örugglega endurtekið.

Öll þessi starfsemi er mjög mikilvæg fyrir samfélagið okkar og það er að sama skapi mikilvægt fyrir sveitarfélagið að geta stutt við þessa starfsemi við stuðlað þannig að betra og áhugaverðara samfélagi fyrir okkur öll.

Sveitarstjórnarfundur 1290 í Strandabyggð
Fundur nr. 1290 í sveitarstjórn Strandabyggðar verður haldinn þriðjudaginn 11. júní 2019 kl 16:00 í Hnyðju.

Fundardagskrá er svohljóðandi:

1. Ákvörðun um niðurfellingu sveitarstjórnarfundar í júlí
2. Hólmadrangur – nauðasamningar
3. Beiðni Rannsóknaseturs HÍ á Ströndum um leigu á herbergi
4. Umhverfisvottun Vestfjarða (Vestfjarðastofa)
a. Laga- og reglugerðaskrá Útgáfa handbókar 003 2019
b. Framkvæmdaáætlun 2019 2024, Vegna umhverfisvottunar sveitarfélaganna á Vestfjörðum
c. Umhverfisstjórnunarhandbók
5. Tillaga Jóns Jónssonar - viðbrögð við fólksfækkun
6. Beiðni um umsögn vegna lausnar lóðarinnar Ingunnarflata á Broddanesi úr landbúnaðarnotkun
7. Stofnsamningur Brunavarna Dala, Reykhóla og Strandabyggðar
8. Skipan fulltrúa Sveitarfélagsins Strandabyggðar á aðalfund Sorpsamlags Strandasýslu
9. Fundargerðir nefnda
a. Umhverfis- og skipulagsnefnd, 3.6.2019
b. Tómstunda-, íþrótta- og menningarnefnd, 6.6.2019
c. Fræðslunefnd, 6.6.2019.
10. Forstöðumannaskýrslur
11. Hafnarsamband Íslands, fundargerð 413 – til kynningar
12. Aðgerðaáætlun um orkuskipti í íslenskum höfnum – til kynningar
13. Siglingaráð Íslands – 14. fundur – til kynningar
14. Fundargerð 122. fundar í Heilbrigðisnefnd Vestfjarðasvæðis – til kynningar
15. Heilbrigðiseftirlit Vestfjarðasvæðis, Ársskýrsla 2018 – til kynningar
16. Fundargerð 871. fundar, stjórnar Sambands íslenskra sveitarfélaga – til kynningar
17. Samband íslenskra sveitarfélaga - Samstarfsvettvangur sveitarfélaganna fyrir heimsmarkmiðin og loftslagsmál – til kynningar
18. Þinggerð 64. Fjórðungsþings Vestfirðinga til kynningar.

Gert er ráð fyrir að eftirtaldir sveitarstjórnarmenn sitji fundinn:
Aðalbjörg Sigurvaldadóttir
Guðfinna Lára Hávarðardóttir
Ingibjörg Benediktsdóttir
Jón Gísli Jónsson
Jón Jónsson

Skútan Panorama kemur til Hólmavíkur fimmtudaginn 13. júní n.k. og er þetta í fyrsta sinn sem skemmtiferðaskip kemur til Hólmavíkur í skipulagða ferð.  Panorama, sem tekur 48 farþega, kemur 9 sinnum í sumar.  Það má segja að góð samvinna og skjót viðbrögð allra sem að málinu komu, hafi gert þetta að veruleika.  Hólmavík er komin á kortið sem formlegur áfangastaður skemmtiferðaskipa!

Farþegar Panorama munu fara í rútuferð með leiðsögn um Strandir, auk þess sem þeir munu heimsækja Sauðfjársetrið, Galdrasafnið og borða á Café Riis.  Við fögnum þessum gestum og þessum áfanga, um leið og við horfum til frekari sóknar inn á þennan markað.  Nú þegar eru komnar fyrirspurnir fyrir sumarið 2021.

Þeir sem vilja fræðast um skútuna og fyrirtækið, geta kíkt á eftirfarandi heimasíðu: https://www.varietycruises.com/ships/ships/panorama​