Leikskólinn Lækjarbrekka auglýsir eftir starfsmanni í 100% stöðu. Leitað er eftir leikskólakennara, uppeldismenntuðu fólki eða fólki sem hefur áhuga á að starfa með börnum. Vinnutíminn er 8:00-16:00. Viðkomandi þarf að geta hafið störf 7. ágúst 2019.

 

Við leikskólann er unnið metnaðarfullt starf þar sem barnið er í brennidepli. Við leikskólann er unnið eftir áherslum jákvæðs aga. Einnig er lögð mikil áhersla á læsi í víðum skilningi. Leitað er eftir öflugum starfsmanni sem hefur gaman af börnum, býr yfir hæfni í mannlegum samskiptum, jákvæðni, sveigjanleika og skipulagshæfni. Einnig eru áreiðanleiki og frumkvæði og sjálfstæði í starfi góður kostur.

 

Umsóknarfrestur er til 28. júlí 2019.

 

Nánari upplýsingar veitir:
Ingibjörg Alma Benjamínsdóttir, leikskólastjóri, sími 845 4589,
netfang: leikskolastjori@strandabyggd.is

Umsóknir með starfsferilsskrá og afriti prófskírteina ásamt upplýsingum um meðmælendur sendist á leikskolastjori@strandabyggd.is eða alma@strandabyggd.is 

Sumarið er ekki búið!  Það hefur verið mikið líf og fjör á Hólmavík að undanförnu.  Alls kyns hátíðir og viðburðir, talsvert um ferðamenn, enda mikið að sækja hingað sem og í Strandabyggð alla og sveitarfélögin í kring um okkur.  Það er líf við höfnina, tjaldsvæðið er þétt skipað, mikið að gera á veitingastöðum, söfnum, kaffihúsum, fólk á gangi um bæinn að skoða og njóta og nýta sér alls kyns þjónustu, allt frá dekkjaviðgerðum til þriggja rétta máltíða o.s.frv., o.s.frv.  Þetta er ánægjulegt og hvetur okkur til dáða; til að gera betur, auka þjónustuna og efla Strandabyggð sem ferðamannastað.  Og eins og við vitum, er Strandabyggð miklu meira en bara Hólmavík: Til dæmis Kaldalón og allt það svæði, sem er kafli útaf fyrir sig.  Þvílík náttúruperla.  Í okkar landi!  Þarna eru mikil tækifæri fyrir okkur íbúa sem og aðra til að njóta þess besta sem okkar landslag og náttúra hefur uppá að bjóða. 

Strandabyggð er sélega vel staðsett þegar kemur að ferðaþjónustu. Héðan er hægt að fara í fjölda stórkostlegra dagsferða; Djúpavík, Drangsnes, Bjarnarfjörður, Norðurfjörður, Krossneslaug, Reykhólar, Dalirnir og þannig mætti lengi telja.

Njótum sumarsins, njótum Strandabyggðar og nágrenis!

Félagsþjónusta Stranda- og Reykhóla auglýsa lausa til umsóknar stöðu félagsmálastjóra frá 1. september 2019.

Félagsþjónusta Stranda og Reykhólahrepps var stofnuð 1. febrúar 2011. Fjögur sveitarfélög sameinast um félagsþjónustuna en það eru Árneshreppur, Kaldrananeshreppur, Strandabyggð og Reykhólahreppur. Félagsmálastjóri hefur aðsetur á Hólmavík en hefur auk þess haft fasta viðveru á Reykhólum einn dag í viku. Sex málaflokkar heyra undir félagsmálastjóra en þeir eru: Barnavernd • Félagsleg heimaþjónusta • Félagsleg ráðgjöf Fjárhagsaðstoð • Málefni aldraðra • Málefni fatlaðra.

Nánari upplýsingar um starfið og umsókn er hægt að finna hér.

Fjölskylduhátíðin Náttúrubarnahátíð á Ströndum verður haldin í þriðja skiptið helgina 19.-21. júlí nú í sumar. Á hátíðinni fá allir gestir, bæði börn og fullorðnir, kjörið tækifæri til að finna eða rækta sitt innra náttúrubarn. Það er Náttúrubarnaskólinn sem stendur fyrir hátíðinni en hann hefur verið starfræktur síðan sumarið 2015. Náttúrubarnaskólinn stendur fyrir fjölbreyttum námskeiðum yfir sumartímann og miðar að því að fræða börn á öllum aldri um ólíkar hliðar náttúrunnar á námskeiðum sem snúast um útivist og náttúruskoðun þar sem þau læra með því að sjá, snerta og upplifa viðfangsefnin....
Meira

Fjölskylduhátíðin Náttúrubarnahátíð á Ströndum verður haldin í þriðja skiptið helgina 19.-21. júlí nú í sumar. Á hátíðinni fá allir gestir, bæði börn og fullorðnir, kjörið tækifæri til að finna eða rækta sitt innra náttúrubarn. Það er Náttúrubarnaskólinn sem stendur fyrir hátíðinni en hann hefur verið starfræktur síðan sumarið 2015. Náttúrubarnaskólinn stendur fyrir fjölbreyttum námskeiðum yfir sumartímann og miðar að því að fræða börn á öllum aldri um ólíkar hliðar náttúrunnar á námskeiðum sem snúast um útivist og náttúruskoðun þar sem þau læra með því að sjá, snerta og upplifa viðfangsefnin.

Náttúrubarnaskólinn er starfræktur innan vébanda Sauðfjársetursins í Sævangi rétt sunnan við Hólmavík, og þar verður hátíðin haldin. Dagrún Ósk Jónsdóttir þjóðfræðingur hefur séð um náttúrubarnaskólann frá upphafi og skipulagningu hátíðarinnar. „Þetta gengur bara frábærlega og við erum æsispennt, eins og alltaf,“ segir Dagrún Ósk. „Við reynum alltaf að hafa fjölbreytta dagskrá sem miðast að því að fræðast um náttúruna og hafa gaman og það tókst bara mjög vel, þó ég segi sjálf frá. Svo fengum við veglega styrki frá Barnamenningarsjóði og Uppbyggingasjóði Vestfjarða sem gerir okkur kleift að hafa ókeypis aðgang að hátíðinni í ár“ bætir Dagrún við.

Hátíðin hefst á föstudegi með fuglaskoðun og síðan setningarathöfn og veðurgaldri. „Veðurgaldurinn á að kalla fram sólskin og gott veður, þetta er svona hálfgerður dans. Hann hefur ekki brugðist okkur ennþá enda allt uppfullt af göldrum hérna á Ströndunum “ segir Dagrún og hlær.

Um helgina verða svo margir fjölbreyttir viðburðir sem flétta saman skemmtun og fróðleik, til dæmis verður Jónsi í Svörtum fötum með tónleika á laugardagskvöldinu. Við fáum góða gesti úr Sirkus Íslands á sunnudeginum og svo verður náttúrubarnakviss og töfrasýning á föstudeginum. Einnig verða smiðjur tengdar útivist, hægt að fara í gönguferðir, á hestbak, í náttúrujóga og sjósund. Það verða drauga- og tröllasögur í Sagnahúsinu, leikhópurinn Miðnætti, Stjörnu-Sævar kemur í heimsókn og margt fleira.

„Ég hvet sem flesta til að kynna sér dagskrána hér í þessari slóð og koma og leika sér með okkur. Það er ótrúlega dýrmætt að fara út og leika sér saman börn og fullorðnir og skapa skemmtilegar minningar. “ segir Dagrún að lokum en hægt er að kynna sér hátíðina á Facebook síðu Náttúrubarnaskólans, á natturubarnaskoli@gmail.com eða hjá Dagrúnu í síma 661-2213.