Aðalfundur Sorpsamlags Strandasýslu verður haldinn þriðjudaginn 6. Júní n.k. í Hnyðju og hefst kl 14.
Dagskrá fundarins:
Hólmavík, 30.5.23
Þorgeir Pálsson
Formaður stjórnar Sorpsamlagsins.
Kæru íbúar Strandabyggðar,
Nokkur orð um síðustu viku, sem var um margt viðburðarrík.
Hótelbygging
Hápunktur liðinnar viku er að mínu mati undirskrift viljayfirlýsingar um hótelbyggingu hér á Hólmavík. Þessi undirskrift er stórt skref í þá átt að hér rísi glæsilegt, 60-70 herbergja hótel. Með tilkomu slíks hótels hér á Hólmavík, er augjóst að staða okkar í ferðaþjónustu á Vestfjarða- og landsvísu, styrkist mikið. Með alla þá afþreyingu sem hér er í boði, er líka ljóst að samstarfsmöguleikar milli ferðaþjóna og hótelsins eru miklir og vonandi hvetur þetta til aukins framboðs á hvers kyns afþreyingu í Strandabyggð. Það verður því mjög spennandi að fylgjast með þeirri skipulags- og hönnunarvinnu sem nú er framundan. Þetta er mikið og tímabært tækifæri fyrir Strandabyggð!
Starfsmaður í sorpi
Á miðvikudag skrapp ég sem starfsmaður Sorpsamlagsins í Árneshrepp, við annan mann. Það var hressandi að komast aðeins út og takast á við það verkefni að sækja rusl. Og það var nóg af því. Ferðin gaf okkur líka tækifæri til að hugleiða og endurmeta þjónustuframboð okkar gagnvart einstaklingum og fyrirtækjum í Árneshrepi og raunar í Bjarnarfirði líka. Svo er náttúrufegurðin á þessari leið auðvitað einstök.
Grunnskólinn
Vinna við grunnskólan heldur áfram. Búið er að sótthreinsa yngri hlutann og raunar hluta gamla hlutans líka, en það liggur fyrir að við getum nýtt anddyrið, salernin og sérkennslustofurnar í gamla hlutanum. Verður lokað inn á ganginn, og aðeins þetta rými nýtt. Næsti verkþáttur er að leggja hitalagnir í gólf og steypa ílögn. Samhliða þessu verður kallað eftir verðhugmyndum í glugga og hurðir. Þetta þróast allt í rétta átt.
Sauðfé og girðingar
Brátt sér fyrir endann á sauðburði og vonandi hefur þetta gengið vel hjá öllum. Girða þarf nokkuð stóran kafla á leiðinni frá Heiðabæ út að Heydalsá og viðræður eru í gangi við Vegagerðina um amk eitt ristarhlið á þeirri leið, inn í Miðdal. Verður girðingarefni, staurar og tilheyrandi pantað í komandi viku.
Verktakavinna
Ein umsókn barst um viðhald með girðingunni frá Grjótá að Hrófá og verður gengið frá samningi í komandi viku. Kominn er verktaki í jarðvegsvinnu vegna drenlagna við grunnskólann. Enginn sótti formlega um slátt á opnum svæðum í sveitarfélaginu, en við erum þó vongóð um að lausn finnist. Þá er verið að vinna að því að fá verktaka í leikskólalóðina, en þar þarf að hefja framkvæmdir sem fyrst. Mönnun verkefna er eitt helsta vandamál sveitarfélaga um allt land þessa dagana og við erum þar engin undantekning.
Það er nóg í gangi enn meira framundan í Strandabyggð. Svo er bara að vona að veðrið fari að spila betur með okkur, þannig að við getum farið að vinna í görðunum okkar og njóta umhverfisins.
Kveðja
Þorgeir Pálsson
oddviti
Kæru íbúar Strandabyggðar,
Í dag var skrifað undir viljayfirlýsingu vegna fyrirhugaðrar hótelbyggingar á Hólmavík. Þetta eru mikil og gleðileg tíðindi fyrir okkur í Strandabyggð og í raun Vestfirði alla. Fulltrúar Fasteignaumsýslunnar ehf komu hingað norður og það var Friðjón Sigurðarson sem skrifaði undir fyrir þeirra hönd. Oddvitar beggja lista í sveitarstjórn Strandabyggðar, Þorgeir Pálsson og Matthías Sævar Lýðsson, skrifuðu undir fyrir hönd sveitarfélagsins. Að auki voru þarna viðstaddir aðrir fulltrúar fjárfesta, arkitektar og sveitarstjórnar.
Með þessari viljayfirlýsingu er skriflega staðfestur sá vilji beggja að hér rísi allt að 70 herbergja hótel. Fer nú af stað skipulagsvinna sem bæði snýr að aðalskipulagi sveitarfélagsins og eins deiliskipulagi hótelreitsins. Hótelið verður staðsett á klettabrúninni fyrir neðan tjaldsvæðið og verður útsýni þaðan algerlega einstakt á landsvísu og þótt víðar væri leitað.
Sem fyrr segir, mun hótelbyggingin hafa í för með sér breytingar á skipulagi og verður sú vinna unnin undir stjórn fyrirtækisins Landmótunar, sem vinnur að endurskoðun aðalskipulags Strandabyggðar. Einnig liggur fyrir endurskipulagningu á núverandi tjaldsvæði, aðkomu og gerð bílastæða fyrir hótelið, sem verða samnýtt með annari starfsemi á svæðinu. Mikil áhersla er lögð á að skapa heildstæða mynd af svæðinu. Framundan er líka gatnagerð, endurhönnun stíga og opinna svæða auk margra annara verkþátta sem verða kynntir þegar fram líður.
Það eru sannarlega spennandi tímar framundan í Strandabyggð!
Kveðja
Þorgeir Pálsson
oddviti
Auka-fundur nr. 1347 í sveitarstjórn Strandabyggðar verður haldinn miðvikudaginn 31. maí kl. 12.30 í Hnyðju Höfðagötu 3, Hólmavík.
Fundardagskrá er svohljóðandi:
Gert er ráð fyrir að eftirtaldir sveitarstjórnarmenn sitji fundinn:
Þorgeir Pálsson
Jón Sigmundsson
Sigríður Guðbjörg Jónsdóttir
Matthías Sævar Lýðsson
Hlíf Hrólfsdóttir
Stefnt er á að streyma fundinum á youtube síðu Strandabyggðar https://www.youtube.com/channel/UCeIjqjE2w2-V0IMQ9ZxplvA
Strandabyggð 26. maí 2023
Þorgeir Pálsson oddviti
