Kæru íbúar Strandabyggðar,

Það er komin helgi og enn ein vikan að baki. Og þessi var alls ekki viðburðalaus, frekar en flestar aðrar. Mín vika byrjaði reyndar með veikindum, þó svo síminn og vinnutengd málefni létu það sig engu skipta.  Það voru verk að vinna.

Grunnskólinn.  Hingað var allt í einu kominn hópur iðnaðarmanna á vegum fyrirtækisins Litla Kletts, að hefja framkvæmdir í grunnskólanum.  Sveitarstjórn Strandabyggðar samþykkti samhljóða þann 18.4 sl. að ganga til samninga við Litla Klett um niðurrif á gólfefnum, klæðningu og múr þar sem þurfti í grunnskólanum.  Það stóð reyndar ekki til að þeir kæmu á mánudag, en stundum þarf einfaldlega að bregðast hratt við og fyrirtækið sá fram á að þurfa að koma núna, ella myndi það missa starfsmenn í sumarleyfi.  Og það er skemmst frá því að segja að mikið hefur áunnist í yngri hlutanum.  Allt gólfefni farið, vissar innréttingar, og nú er hægt að fara að hanna þennan hluta að nýju.  Starfsmenn Strandabyggðar unnu frábært verk við að tæma stofur, fjarlægja og farga rusli, dúk og múrbrotum ofl.  Vinna við uppbyggingu grunnskólans er hafin og það er mikið gleðiefni.

Wilson Skaw.  Íbúar hafa fylgst með þróun mála út um gluggana hjá sér og verður að segjast að atburðarrásin hefur oft verið spennandi, sérstaklega ef frásagnir og umræða í fjölmiðlum væru teknar með í myndina.  Frásagnir fjölmiðla voru þó ekki alltaf í takt við sannleikann en þannig er það bara.  Það stóð t.d.aldrei til að skipið leggðist að bryggju hér, þótt því hafi verið haldið fram í fjölmiðlum.  Landhelgisgæslan óskaði eftir því í vikunni að fá að draga skipið inn fyrir hafnarsvæði Strandabyggðar og þar með dróst sveitarfélagið beint inn í málið. Þessu fylgir mikil ábyrgð og nauðsynlegt að huga vel að öllum hagsmunum sveitarfélagsins.  Óskað var eftir aðstoð Umhverfisstofnunar og lögmaður sveitarfélgsins var ræstur út.  Í dag eru öll ábyrgðarmál á hreinu, björgunaráætlun hefur verið samþykkt og innan vikutíma eða svo ætti skipið að geta farið héðan í togi til Akureyrar.  Vonandi gengur þessi áætlun eftir.   Ég verð hins vegar að viðurkenna að þrátt fyrir allt, þá hefur verið gaman að sjá Freyju, þetta tignarlega skip okkar allra, hér rétt fyrir utan á morgnana og í ljósadýrðinni á kvöldin. 

Íbúafundur.  Mjög góður og fjölmennur íbúafundur um málefni grunnskólans var haldinn í vikunni.  Þar voru fulltrúar EFLU með kynningu og svörðuðu spurningum fundarmanna.  Síðan sat sveitarstjórn fyrir svörum.  Ég hef þá trú að fundurinn hafi verið upplýsandi og staðfest þá ætlan sveitarstjórnar að hefja endurgera grunnskólann eins og hægt er, enda staðfesti EFLA það í ársbyrjun að skólinn væri viðgerðarhæfur.  Það er þó enn margt óljóst og mikil vinna óunnin, en við erum á réttri leið.

Ársreikningur síðasta árs ofl.  Á þessum tíma leggja sveitarfélög fram ársreikninga sína fyrir undangengið ár.  Það hefur þó dregist hjá okkur sem og öðrum sveitarfélögum á Vestfjörðum, þar sem illa hefur gengið að gera upp síðasta ár hjá Byggðasamlagi Vestfjarða um málefni fatlaðra, BS Vest.  Vonandi klárast þetta þó á næstu dögum.

Sumarvinna.  Verkefni sumarsins eru að skýrast sem og mönnun í þau.  Það er alltaf púsluspil sem oftast gengur þó upp á endanum og við vonum að svo verði einnig nú.

Skíðafélag Strandamanna.  Vikunni lauk hjá mér á uppskeruhátíð skíðafélagsins, en þá hafði ég reyndar skipt um hlutverk og var þar sem stoltur farðir tveggja krakka sem finnst fátt skemmtilegra en að vera á gönguskíðum með frábærum hópi krakka og þjálfara hjá Skíðafélagi Strandamanna. Þarna var farið í leiki, reipitog, boðið upp á kökur og grillaðar pylsur, veitt verðlaun fyrir ástundun ofl.  Jákvæðni og samstaða í hverju orði!

Góða helgi kæru íbúar,  njótum lífsins í Strandabyggð!

Kveðja

Þorgeir Pálsson

Oddviti

Strandabyggð óskar hér með eftir verðhugmyndum frá verktökum í eftrfarandi verkþátt:

• Grafa fyrir drenlögn við grunnskólann.
• Tímakaup á vélum og bílum ásamt km gjaldi
• Tímakaup á manni

Verkefnið skal vinna í samráði við starfsmenn þjónustumiðstöðvar. Áhugasamir skulu skila inn verðhugmyndum á skrifstofu Strandabyggðar eða á netfangið strandabyggd@strandabyggd.is, merkt „grunnskóli – dren“, fyrir kl 12, miðvikudaginn 3. maí n.k.  Verktaki þarf að geta hafið störf við verkefnið um leið og því verður úthlutað.

Allar frekari upplýsingar veita, Þorgeir í síma 899-0020 og/eða Sigurður Marinó í síma 894-4806.

Strandabyggð barst í gær, 25.4. beiðni frá Landhelgisgæslunni um að fá að koma Wilson Skaw fyrir við akkeri innan hafnarsvæðis sveitarfélagsins u.þ.b. 0,5 sjómílur SA- af hafnarmynni Hólmavíkurhafnar á meðan næstu skref væru metin og mögulega á meðan bráðarbirgðaviðgerð fer fram.

Staðsetning skipsins er valin með það í huga að skipið hafi ekki nein áhrif á siglingaleiðina til Hólmavíkur.  Einfalt er að auki að draga skipið burt, gerist þess þörf.

Ekki hefur komið til álita að taka skipið upp að bryggju, enda ristir það dýpra en höfnin leyfir (6,0 m), eins og eflaust margir hafa tekið eftir er skipið djúprist að aftan um 6,8 metra og ekki hægt að breyta því þar sem göt eru komin á tanka skipsins að framan  sem venjulega eru fylltir af sjó til þess að rétta af djúpristuna.  Það hefur komið til álita hvort hægt væri að færa farminn til í skipinu til þess að minnka djúpristuna að aftan og koma því til hafnar en engin ákvörðum um það hefur verið tekin, hvorki af útgerð né björgunaraðilum, enda ekki ljóst það sé nægjanlegt til þess að skipið komist að höfninni.

Kveðja
Þorgeir Pálsson
Oddviti

Kæru íbúar Strandabyggðar og aðrir áhugasamir,

Það er rétt að taka það fram, í ljósi umræðu og skrifa í fjölmiðlum, að engin formleg ákvörðun hefur verið tekin af sveitarstjórn Strandabyggðar varðandi komu Wilson Skaw til Hólmavíkur, hvað svo sem verður.  Við höfum átt í samskiptum við hagsmunaaðila, Umhverfisstofnun og lögfræðing sveitarfélagsins og erum einfaldlega að skoða allar hliðar málsins út frá hagsmunum sveitarfélagsins.

Hitt er svo annað að við í Strandabyggð viljum auðvitað sjá farsæla lausn á þessu máli sem fyrst.

Kveðja
Þorgeir Pálsson
Oddviti

Samkvæmt 1. mgr. 30. gr. og 1. mgr. 40.gr skipulagslaga nr. 123/2010 er hér kynnt skipulagslýsing vegna fyrirhugaðrar breytingar á aðalskipulagi og gerð deiliskipulags:

Kvíslatunguvirkjun – breyting á aðalskipulagi og nýtt deiliskipulag

Sveitarstjórn Strandabyggðar samþykkti á fundi sínum þann 18. apríl 2023 að kynna skipulagslýsingu um fyrirhugaða breytingu á Aðalskipulagi Strandabyggðar 2010-2022 vegna og gerð deiliskipulags fyrir Kvíslatunguvirkjun.

Í aðalskipulagsbreytingunni felst að marka stefnu um Kvíslatunguvirkjun í Selárdal. Hluti landbúnaðarsvæðis í Selárdal, þar sem fyrirhugað er að reisa stöðvarhús og tengd mannvirki, verður breytt í iðnaðarsvæði. Ofar, þar sem nú er óbyggt svæði, verður gerð grein fyrir helstu mannvirkjum tengd virkjuninni, þ.e.a.s. stíflum, miðlunarlónum og öðrum veitumannvirkjum. Einnig verða vegir, raflínur og efnistökusvæði tilgreind í skipulagsbreytingunni.
Samhliða aðalskipulagsbreytingu verður unnin og kynnt tillaga að deiliskipulagi virkjunarsvæðis.

Skipulagslýsing sjá hér í tengli

Athugasemdir og ábendingar um lýsinguna skulu vera skriflegar og berast skipulagsfulltrúa í netfangið skipulag@dalir.is eða á skrifstofu Strandabyggðar, Hafnarbraut 25, 510 Hólmavík í síðasta lagi 15. maí 2023.

Skipulagsfulltrúi Strandabyggðar