Nú stendur innritun yfir fyrir nemendur 10. bekkjar í framhaldsskóla og nýlega var bæklingur um skólann sendur á heimili í Strandabyggð og nágrannasveitarfélaga.  Á heimasíðu skólans kemur fram að FNV er vinalegur skóli þar sem gott samband er á milli nemenda og starfsfólks. Einkunnarorð skólans eru vinnusemi, vellíðan og virðing. Við leggjum áherslu á góða þjónustu og stuðning við nemendur og að sem flestir geti fundið nám við hæfi. Hægt er að leggja stund á bóknám, iðnnám, starfsnám og fleira.

Nemendur í dagskóla sækja skólann á Sauðárkróki eða í dreifnámi á Blönduósi, Hvammstanga eða Hólmavík. Nemendur í fjarnámi geta stundað námið hvaðan sem er af landinu eða hvar sem er í heiminum.

Heimavist skólans er vel búin og herbergi eru nýuppgerð. Í mötuneytinu er lögð áhersla á hollan mat.

Nemendafélag skólans, NFNV, stendur fyrir öflugu félagslífi þar sem nemendur fá tækifæri til að rækta hæfileika sína.

• Áfangar í boði
  
• Námsráðgjöf
• Val í INNU - leiðbeiningar
• Viðtalstímar

Við hvetjum fólk sem er áhugasamt um að kynna sér námsleiðir að hafa samband við námsráðgjafa eða Atla umsjónarmann dreifnámsins á Hólmavík.  Ýmsar iðngreinar er hægt að skrá sig í til að fá réttindi og hingað vantar t.d fólk með menntun í ýmsum iðngreinum.

Á fundi sveitarstjórnar Strandabyggðar í gær var lagður fram ársreikningur fyrir 2021 til seinni umræðu og var hann samþykktur. Þar kemur fram að rekstarniðurstaða sveitarfélagsins samkvæmt samanteknum ársreikningi A og B hluta var neikvæð um 39,5 milljónir króna. Í A hluta var rekstrarniðurstaðan neikvæð um 28 milljónir króna en upphafleg fjárhagsáætlun hljóðaði upp á neikvæða niðurstöðu upp á 62,3 milljónir króna. Þá kemur fram að skuldir og skuldbindingar A og B hluta nema samtals 862,5 millj. kr. skv. efnahagsreikningi.

 

Í fundargerð kemur fram að handbært fé frá rekstri í A og B hluta samanlögðum er 36,7 millj. kr. sem er mjög jákvæð breyting og viðsnúningur miðað við síðustu ár, en árið áður var handbært fé frá rekstri neikvætt um 47,6 millj. Þetta hefur áhrif á rekstur sveitarfélagsins sem skilar afgangi til að greiða af lánum og í framkvæmdir. Eigið fé sveitarfélagsins í árslok 2022 nam 226,9 millj. kr. samkvæmt efnahagsreikningi, en eigið fé A hluta nam 326,5 millj. kr.

Fram kemur að helstu ástæður fyrir mun á fjárhagsáætlun fyrir árið 2021, með samþykktum viðaukum, og niðurstöðu ársreikningsins felast í uppreiknuðum lífeyriskuldbindingum og vaxtagjöldum sem eru töluvert hærri en áætlað var. Einnig að gerð hafi verið mistök við samþykkt fjárhagsáætlunar fyrir árið 2021 um áhrif af sölu Veitustofnunar sveitarfélagsins á ljósleiðara sem eru leiðrétt í reikningnum. Ársreikningurinn var samþykktur samhljóða og verður birtur á vef sveitarfélagsins, ásamt Endurskoðunarskýrslu fyrir 2021.

Lesa má fundargerð sveitarstjórnar á vef sveitarfélagsins.

Sveitarstjórn Strandabyggðar hefur sótt um leyfi til að áfrýja til Landsréttar dómi Héraðsdóms Vestfjarða í dómsmáli E-136/2021, sem höfðað var gegn sveitarfélaginu. Þetta kemur fram í fundargerð sveitarstjórnar frá því í gær þar sem sveitarstjórn staðfesti ákvörðunina samhljóða.

Á sveitarstjórnarfundi í gær var lögð fram eftirfarandi bókun:

„Sveitarstjórn telur, að fenginni ráðgjöf, að dómafordæmi úr Hæstarétti sýni að dómur Héraðsdóms um miskabætur sé rangur. Óeðlilegt sé að dæma miskabætur þegar uppsögnin sjálf sé lögleg og enginn vafi leiki á því að svo sé í þessu tilviki. Uppsögnin var í fullu samræmi við ráðningarsamning og þær aðferðir sem tíðkast í sambærilegum tilvikum. Eins telur sveitarstjórn eðlilegt að verja hagsmuni sveitarfélagsins gagnvart því að þurfa að greiða málskostnað, þegar um sé að ræða tilhæfulausar málssóknir. Mikilvægt sé að fá úr þessu skorið vegna fordæmisgildis dómsins.“

Þetta kemur fram í fundargerð sveitarstjórnar Strandabyggðar.

Strandabyggð óskar eftir umsjónarmönnum um viðhald fjárgirðinga frá Grjótá að Hrófá. Samningur inniheldur vinnu við viðhald girðinga,slátt meðfram girðingu ásamt því að halda búfé utan girðingar eins og kostur er. Efni til viðhalds er innifalið. Samningur verður gerður til 3ja ára og verður hagstæðasta tilboði tekið.  Frestur til að skila inn tilboði er til og með 23. maí. Nánari upplýsingar eru í síma 451-3510 og á netfanginu strandabyggd@strandabyggd.is

 

Fundur nr. 1331 í sveitarstjórn Strandabyggðar verður haldinn þriðjudaginn 10.maí 2022 kl. 16.00 í Hnyðju Höfðagötu 3, Hólmavík.

 

Fundardagskrá er svohljóðandi: 

1. Ársreikningur Strandabyggðar 2021 seinni umræða
2. Viðauki II
3. Minnisblað frá skrifstofustjóra staða 1. Ársfjórðungs
4. Jafnlaunavottun Strandabyggðar
5. Brunavarnaráætlun Brunavarna Dala,Reykhóla og Strandabyggðar
6. Samningur við Rannsóknarsetur Háskóla Íslands á Ströndum um verndarsvæði í byggð
7. Erindi Þorsteinn Sigfússon v.Miðtúns
8. Ráðning grenjaveiðiaðila á svæði 6
9. Forstöðumannaskýrslur
10. Samband sveitarfélaga fundargerð nr. 909 27. apríl 2022
11. Hafnarsamband Íslands stjórnarfundur nr. 443 1. apríl 2022 

 

Gert er ráð fyrir að eftirtaldir sveitarstjórnarmenn sitji fundinn:

Jón Gísli Jónsson

Ásta Þórisdóttir

Guðfinna Lára Hávarðardóttir

Pétur Matthíasson

Jón Jónsson

  

Strandabyggð 7.maí 2022

Jón Gísli Jónsson oddviti