Kær íbúar Strandabyggðar,

Nýlega var úthlutað rúmum 7 milljónum úr Frumkvæðissjóði Sterkra Stranda. Hægt er að lesa nánar um þetta hér á https://strandir.is/

Mjög margir sóttu um að þessu sinni og ljóst að ekki fengu allir styrk.  það þýðir þó ekki að þau verkefni sem ekki fengu styrk að þessu sinni, séu ekki frambærileg.  Það er mikilvægt að þeir einstaklingar sem fengu neitun í þetta skiptið, haldi áfram með sínar hugmyndir, fái upplýsingar um hvað þurfi að bæta og hvernig, þannig að góðar hugmyndir haldi áfram að þróast meðal íbúa.

Ég hvet hlutaðeigandi til að hafa samband við verkefnastjóra Brothættra byggða, Sigurð Líndal sigurdurl@vestfirdir.is  og halda ótrauð áfram.  Það er eitt að fá hugmynd, annað að vinna henni framgang. Sagan segir að það hafi t.d. tekið Magnús Scheving rúm 10 ár að ná virkilegu flugi og athygli með Latabæ, en það tókst.  Þetta ferli kallar á úthald, andlegt og fjárhagslegt, gott bakland, faglegan stuðning, en umfram allt; trú á sjálfan sig og verkefnið! 

Kveðja
Þorgeir Pálsson,
sveitarstjóri í Strandabyggð

Í dag kl 17 fer fram annað ungmennaþing ársins.

Óli Örn verður gestur þingsins en hann kynnir fyrir okkur fjölmarga möguleika til að fá styrki fyrir ungmennaverkefni í gegn um Erasmus+. Meðal annars er hægt að fara í ungmennaskipti þar sem hópar ungmenna skiptast á að heimsækja hvern annan og vinna að sameiginlegum markmiðum. Tækifærin eru ótalmörg!

Viðburðurinn verður í félagsmiðstöðinni Ozon en líka á Zoom, nánar um viðburðinn á Facebook

Kæri íbúar Strandabyggðar,

Sveitarstjórn samþykkti á fundi sínum þann 13. apríl s.l., reglur sem lúta að meðferð og birtingu fundargagna í Strandabyggð.  Með þessu vill sveitarfélagið auka aðgengi íbúa að gögnum sem tekin eru til meðferðar á sveitarstjórnarfundum og öðrum fundum á vegum sveitarfélagsins og sem eru um leið grunnur að ákvörðunum sveitarfélagsins. 

Reglurnar eru eftirfarandi, en þær má líka nálgast hér á pdf formi.

1. Tilgangur og gildissvið

Reglur þessar gilda um opinbera birtingu á hvers konar skjölum sem notuð eru af og í þágu sveitarfélagsins, þar með taldar; fundargerðir nefnda og sveitarstjórnar, minnisblöð starfsmanna sveitarfélagsins og minnisblöð sem sveitarfélagið móttekur vegna erinda, verkefna, samninga eða af öðru tilefni.  Þessi skilgreining nær til A og B hluta starfsemi sveitarfélagsins....
Meira

Hér er hægt að finna umfjöllun Heilbrigðisráðuneytisins um nýjar reglugerðir.

Reglugerðirnar og minnisblað sóttvarnalæknis er svo að finna í lok umfjöllunarinnar.

https://www.stjornarradid.is/efst-a-baugi/frettir/stok-frett/2021/04/13/COVID-19-Tilslakanir-a-samkomutakmorkunum-og-i-skolastarfi-fra-16.-april/

Kæru íbúar Strandabyggðar,

Eins og þið hafið sjálfsagt heyrt um, hefur Strandabyggð fengið styrk úr Jöfnunarsjóði til að framkvæma svokallaða valkostagreiningu.  Þessi vinna er í tengslum við hugsanlega sameiningu sveitarféælaga, sem er framundan og hefur mikið verið rædd undanfarna mánuði.

Valkostagreiningu er ætlað að draga upp myndir af þeim sameiningarkostum sem sveitarfélagið gæti viljað skoða frekar og eru þá kostir og gallar við hverja sameingarvalkosti tíundaðir.  Strandabyggð hefur ráðið ráðgjafafyrirtækið RR Ráðgjöf til að vinna þetta verkefni með okkur.  Fyrir helgina var haldinn fyrsti fundur okkar með RR Ráðgjöf og sátu þann fjarfund fulltrúar í sveitarstjórn, forstöðumenn og nefndarmenn í Strandabyggð. 

Þar kom m.a. fram, að „markmið verkefnisins er að greina styrkleika, veikleika, ógnanir og tækifæri Strandabyggðar ef til sameiningar sveitarfélagsins kemur. Í því felst jafnframt að greina sameiningarvalkosti.  Afurð verkefnisins verður minnisblað sem lýsir niðurstöðum verkefnisins og auðveldar sveitarstjórn Strandabyggðar að meta hvort og þá við hvaða sveitarfélög skuli hefja  sameiningarviðræður“.

Við bindum miklar vonir við þetta verkefni sem ætti að hjálpa okkur að vega og meta hvernig við sjáum Strandabyggð þróast með sameiningu við önnur sveitarfélög.  Það er líka mikilvægt að þetta verkefni og sú vinna og umræða sem því tengist, hjálpi okkur að skilja sérstöðu Strandabyggðar; hvað það raunverulega er sem við höfum fram að færa, hvað okkur vantar o.s.frv. 

Framundan eru vinnufundur og íbúafundir sem við greinum nánar frá síðar sem og framgangi verkefnisins, sem við reiknum með að ljúki í haust. 

 

Kveðja

Þorgeir Pálsson

sveitarstjóri Strandabyggðar