Kæru íbúar Strandabyggðar,

 

Covid-19 faraldurinn er í sókn að því er virðist og nokkur smit hafa greinst undanfarið á Vestfjörðum, auk mikils fjölda smita á höfðuborgarsvæðinu og víðar. Ríkislögreglustjóri hefur lýst yfir neyðarstigi almannavarna í samráði við sóttvarnalækni.  Faraldurinn virðist færast nær okkur og því rétt að rifja upp nokkur mikilvæg atriði sem við kynntum í vor. 

 

Þarftu aðstoð?

Strandabyggð, Rauði Krossinn og sóknarprestur leituðu í vor til fólks í Strandabyggð og um að skrá sig á lista yfir sjálfboðaliða sem vildu taka að sér að aðstoða íbúa við ýmis verk.  Þessi listi er ennþá til og við hvetjum fólk sem á erfitt með að komast milli staða að nýta sér þessa þjónustu, til að t.d. fá keypta matvöru eða sinna erindum á pósthús eða aðra staði.  Eins er alltaf hægt að hringja bara til að spjalla.

Við hvetjum íbúa til að hringja í eitthvað eftirtalinna númera:  451-3510 (Skrifstofa Strandabyggðar), 862-3517 (Sigríður Óladóttir, sóknarprestur) eða 899-0020 (Þorgeir Pálsson, sveitarstjóri).

 

Lokanir og skerðing þjónustu

Eins og fram hefur komið, eru nú hertar reglur.  Samkomutakmarkanir miðast við 20 manns, Flosabóli hefur verið lokað og hámark gesta í sundlaug er helmingur af leyfðum fjölda.  Skólarnir starfa hins vegar ennþá með óbreyttu sniði, sem skrifstofa og aðrar stofnanir sveitarfélagsins

Þetta gæti hins vegar allt breyst og því er mikilvægt að fylgjast vel með á heima- og facebook síðum sveitarfélagsins og stofnanna þess. 

 

Hreinlæti og sóttvarnir

Við þurfum nú að skerpa á okkar eigin vörnum, með handþvotti og sprittun.  Fjarlægðarmörk eru 1 meter milli manna og við verðum að muna þetta í návígi við annað fólk.  Reynum að takmarka sem mest slíka áhættu þegar við erum innan um ókunnuga, hvort heldur hér í Strandabyggð eða annars staðar á landinu.

Þrátt fyrir allan þann fjölda ferðamanna sem kom hingað í sumar eða á leið um núna, hefur enn sem komið er ekki greinst smit í Strandabyggð.  Við vonumst auðvitað til að halda þeirri stöðu og því má nú hvergi slaka á.

 

Kveðja

Þorgeir Pálsson

Sveitarstjóri Strandabyggðar

 

Hér nokkrar ganglegar heimasíður fyrir þá sem vilja kynna sér málið betur. 

www.covid.is

https://www.landlaeknir.is/

https://www.samband.is/um-sambandid/upplysingasida-vegna-covid-19/

http://www.strandabyggd.is/grunnskolinn/

http://www.strandabyggd.is/leikskolinn/
https://www.facebook.com/Jakobinutuni/

 

Kæru íbúar Strandabyggðar og aðrir, 

Því er gjarnan haldið fram, að sókn sé besta vörnin og það á kannski einmitt við nú þegar Strandabyggð glímir við afleiðingar niðurskurðar á framlögum Jöfnunarsjóðs, sem hafa verið skert um rúmar 70 milljónir á þessu ári.  Aðhald og hagræðing er eðlileg afleiðing af slíkum niðurskurði.

Á sama tíma má ekki gleyma því að horfa til framtíðar.  Hér í Strandabyggð hefur lengi verið augljós skortur á skrifstofuhúsnæði og hefur það staðið okkur fyrir þrifum hvað það varðar t.d. að sækja í störf án staðsetningar.  Það er erfitt að hvetja fyrirtæki og einstaklinga til að setja upp fyrirtæki og rekstur há á Hólmavík, án húsnæðis.

Nú hefur opnast nýtt tækifæri hvað þetta varðar.  Sveitarstjórn hefur ákveðið að kaupa miðhæð og kjallara Hafnarbrautar 25, þar sem Arionbanki var áður.  Skrifstofa Strandabyggðar mun færa sig yfir í húsið á næstu vikum og koma sér fyrir þar, í samneyti við Sýslumanninn á Vestfjörðum, sem verður áfram á efstu hæðinni.  Má segja að þarna sé komið Stjórnsýsluhús Strandabyggðar.  Við þetta losna amk fimm herbergi í Þróunarsetrinu og verður settur kraftur í að auglýsa þau til einstaklinga og fyrirtækja, bæði heimamanna sem og utanaðkomandi. Það er von okkar að með þessu náist tvennt;  að skapa þægilegri aðkomu að skrifstofu sveitarfélagsins og efla nýsköpun og frumkvöðlastarf í Þróunarsetrinu á sama tíma. 

Þótt aðstæður séu um margt sérstakar og fjárfesting af þessi tagi ekki augljós framkvæmd, er það trú okkar að með þessu séum við að skapa ný tækifæri til framtíðar, sem muni styrkja atvinnulíf í og stjórnsýslu Strandabyggðar.

Kveðja
Þorgeir Pálsson
Sveitarstjóri Strandabyggðar

Lokað verður fyrir vatnið í eftirfarandi götum Austurtúni , Höfðatúni, Lækjartúni, Miðtúni, Vesturtúni, Víkurtúni og Hafnarbraut 2 vegna tenginga á morgun fimmtudaginn 24. september frá kl 9:00 áætlað er að lokunin standi í um eina klukkustund.

Við vekjum athygli á að Jónas Guðmundsson sýslumaður á Vestfjörðum verður til viðtals á sýsluskrifstofunni á Hólmavík  fimmtudaginn 24.sept nk. 

Minnt skal á að alltaf má hafa samband við sýslumann eða löglærðan fulltrúa símleiðis eða í tölvupósti. Miðað er við að viðtalstími hverju sinni sé milli kl. 11:00 - 12:00 og 13:00 - 14:00. Sími: 458 2400 

Esther Ösp Valdimarsdóttir hefur verið ráðin sem tómstundafulltrúi Strandabyggðar og mun taka við því starfi á næstu vikum en þó ekki alfarið fyrr en náðst hefur að endurskipuleggja kennslu í 1.-4. bekk, en Esther Ösp var þar umsjónarkennari.

Esther Ösp er með viðbótardiplóma í kennslufræði framhaldsskóla við Háskóla Íslands, MA nám í mannfræði við Háskóla Íslands, BA í mannfræði frá Háskóla Íslands, stúdentspróf af náttúrufræðibraut, líffræðisviði frá Kvennaskólanum í Reykjavík.  Þá tók hún ársnám við fjöltyngdan og alþjóðlegan menntaskóla í Mexíkó.

Esther Ösp hefur víðtæka reynslu og má þar nefna: verkefnastjórn í kennsluþróun og ráðgjöf við Grunnaskólann á Hólmavík, rekstur Hvatastöðvarinnar, sjálfseflingarseturs, en Esther Ösp er með Jógakennaranám frá Jógastúdíó, viðurkennt af Yoga Alliance.  Hún hefur starfað sem umsjónarkennari við Grunnskólann á Hólmavík, unnið að og sett upp sýninguna „Strönduð í sveit“, auk þess að hafa komið að leiðbeinendastarfi meistaranema, leikhússtörfum, stundakennslu við Háskóla Íslands, framkvæmdastjórn Héraðssambands Strandamanna ofl.

Esther Ösp var tómstundafulltrúi Strandabyggðar árin 2013-2017 og er því vel kunn þessu starfi.

Við bjóðum Esther Ösp velkomna til starfa og væntum góðs af hennar þekkingu og reynslu á þessu sviði, enda mörg spennandi verkefni framundan.