Við minnum á fundinn á morgun, miðvikudag  í Hnyðju, kl 17-19, sem Grunnskólinn á Hólmavík, Trappa og Strandabyggð standa fyrir.

Kristrún Lind Birgisdóttir frá Tröppu, mun fara yfir áherslur í starfi leik- og grunnskóla og hvernig unnið er eftir aðalnámskrá hvað þessi skólastig varðar.  Fundarstjóri er Þorgeir Pálsson.

Hér er kjörið tækifæri til að fræðast um þær áherslur og þau viðmið sem skólastarf á Hólmavík styðst við og ræða hvernig við getum eflt og stutt við skólastarf í Strandabyggð.

Við hvetjum foreldra, aðstandendur og aðra áhugasama um menntamál, til að mæta.

Á vef Ríkisskattstjóra (www.rsk.is)  kemur fram, að "nú þurfa allir lögaðilar sem stunda atvinnurekstur hér á landi eða eru skráðir í fyrirtækjaskrá að afla upplýsinga um og skrá raunverulega eigendur sína og réttindi þeirra".

Frestur til að skila inn þessum upplýsingum er til 1. mars n.k. og má búast við sektum eftir þann tíma, hafi viðeigangi gögnum ekki verið skilað inn.

Við hvejum alla sem eru í forsvari fyrir félagasamtök, lögaðila í atvinnurekstri eða aðra sem falla undir þessa skilgreiningu, að kynna sér málið og má t.d. finna leiðbeiningar hér:  https://www.rsk.is/um-rsk/frettir-og-tilkynningar/frettatilkynning-vegna-skraningar-raunverulegra-eigenda

Ungmennaráð Strandabyggðar hitti sveitarstjórn og sveitarstjóra á fundi í gær, 11. febrúar í Hnyðju.  Þar var mikið rætt og skipst á skoðunum um ýmislegt; allt frá aðgengi að orkudrykkjum til heimsókna ungmennaráðs á Heilbrigðisstofnun Vesturlands á Hólmavík.  Ungmennin ætla að heimsækja heilbrigðisstofnunina einu sinni í viku til að spjalla við vistmenn, spila og hafa gaman.

Fram kom á fundinum að Ungmennaráð vill virkja nemendur innan grunnskólans, efla nemendaráð og vera almennt virkar í að móta sitt umhverfi.  Rætt var um símabann, sem nemendur sjálfir settu á í skólanum þessa vikuna og þótti þeim öllum það gott fyrirkomulag.

Sveitarstjórn tók fagnandi á móti ungmennaráði og hvetur til fleiri heimsókna af þessu tagi.

Grunnskólinn á Hólmavík, Trappa og Strandabyggð, standa fyrir fundi um menntamál í Hnyðju miðvikudaginn 19. febrúar n.k. kl 17-19. 

 

Kristrún Lind Birgisdóttir frá Tröppu, mun fara yfir áherslur í starfi grunnskóla og hvernig unnið er eftir aðalnámskrá grunnskóla.  Hér er kjörið tækifæri til að fræðast um þær áherslur og þau viðmið sem skólastarf á Hólmavík styðst við og ræða hvernig við getum eflt og stutt við skólastarf í Strandabyggð. 

Fundarstjóri er Þorgeir Pálsson.

Á Íþróttahátíð Grunnskólans á Hólmavík, sem haldin var nýverið, voru veitt verðlaun vegna góðs árangurs í íþróttum í Strandabyggð.

Íþróttamaður ársins 2019 í Strandabyggð var valin Ragnheiður Birna Guðmundsdóttir.
Hún hefur undanfarna mánuði, jafnvel ár, verið að  mæta í Íþróttamiðstöðina að meðaltali 6x í viku við ýmsar æfingar og má segja að Flosaból sé hennar annað heimili. Ragnheiður er frábær fyrirmynd í að hvetja aðra til hreyfings og hefur verið fús til að aðstoða og leiðbeina á öllum aldursstigum. Hún fær einróma hrós fyrir að þjálfa/leiðbeina eldri borgurum 1x í viku og þá bæði við æfingar í sal og Flosabóli. Viljum við íbúar í Strandabyggð þakka fyrir þann metnað, gleði og hvatningu sem lögð er í það verkefni.

 

Hvatningarverðlaun 2019 hlaut að þessu sinni Árný Helga Birkisdóttir. Hún hefur tekið þátt í mörgum íþróttamótum og má þar helst nefna Flandraspretti, götuhlaup HSS, Hamingjuhlaup, Silfurleikum ÍR, stórmót ÍR, minningarmóti Ólivers í frjálsum, Andrésar Andar leikarnir, ULM 2019 á Höfn, Þrístrendingnum 2019 sem og fótboltamót, félagsmót og síðast en ekki síst 10km hlaup í Tallin í Eistlandi í haust.