Kæru íbúar Strandabyggðar,

Það er virkilega gaman að segja frá því að nú sér fyrir endann á þeirri uppbyggingu sem unnið hefur verið að í yngri hluta grunnskólans.  Byggingin hefur tekið stakkaskiptum á liðnum mánuðum enda hópur iðnaðarmanna að störfum að jafnaði.  Staðan núna er í stórum dráttum eftirfarandi:

Efri hæð:

• Efri hæðin er nánast tilbúin
• Loft eru frágengin, ljós tilbúin og verið er að tengja loftræstikerfi
• Frágangur á skápum og vöskum er á lokastigi og á aðeins eftir að setja upp krana í vaska í kennslustofum
• Allt er tilbúið fyrir lokamálun.  Verktaki er kominn í þá vinnu
• Í eldhúsi er nánast allt frágengið.  Allar innréttingar komnar upp, búið að flísaleggja og tæki komin
• Öll klósett eru komin upp, eftir er að setja milliveggi og verður það gert eftir að dúkur er komin á gólfin.  Borðplata og vaskar koma á næstu dögum.  Á salerni fatlaðra á eftir að setja upp tæki, en búið er að flísaleggja veggi og fúa
• Samverurými.  Allt tilbúið í loftum, lýsing komin.  Unnið að tengingu loftræstikerfis.  Frágangur við stiga og handrið í undirbúningi
• Hannyrðarými.  Unnið í loftræstikerfi.  Búið að ganga frá ljósum í lofti og unnið að lokafrágangi
• Dúklagning.  Verktaki mun hefja vinnu við dúklagningu seinni hluta þessa mánaðar og skilar af sér 1 ágúst
• Hurðir í kennslurými kennara og glerveggir verða settir í eftir að búið er að dúkleggja. Eru það í raun síðustu verkþættirnir.

Neðri hæð: 

• Eftir er að einangra og loka lofti með plötum.  Það er þó fljótlegt í framkvæmd og mun einfaldara en á efri hæð.  Vinna við það hefst innan fárra daga
• Öll vinna við rafmagn er nánast að baki enda mun einfaldara við að eiga; einfaldari hönnun og færri ljós
• Eftir er að tengja nýtt vatnsinntak.  Verktaki er kominn í lokafrágang
• Málari á eftir lokaumferð en er kominn á staðinn og undirbúnngsvinna hafin.

Samantekt:  Óhætt er að segja að þessi uppbygging sé nánast öll komin.  Verktakar eru meðvitaðir um tímaramma og upphaf skólaárs, sem og að það þarf að þrífa og koma húsgögnum og öðru fyrir.  Það eru því mörg verkefni eftir þannig séð, en stóra myndin er komin og aðeins lokahnykkurinn eftir.

Kveðja
Þorgeir Pálsson
oddviti

 

Kæru íbúar Strandabyggðar,

Heilbrigðiseftirlit Vestfjarða var hér nýlega og límdi miða á bíla hér á Hólmavík. Í bréfi frá Heilbrigðiseftirlitinu sem barst nýlega, kemur fram eftirfarandi:

"Þann 29. maí 2024. fóru starfsmenn Heilbrigðiseftirlits Vestfjarða í eftirlitsferð um Hólmavík. Límdar voru tilkynningar á númerslausa bíla, samtals 22 stk. Bílarnir eru staðsettir á lóðum Strandabyggðar og lóðum fyrirtækja og einstaklinga. Gefin var frestur til 12. júní í 2024 til að fjarlægja viðkomandi hlut. Límdir voru rauðir miðar sem tilkynna stjórnvaldsákvörðun um að bíllinn verði fjarlægður".

Nú er staðan þannig að sveitarfélaginu hefur verið falið af heilbrigðisyfirvöldum, að "sjá um að fjarlægja númerslausar bifreiðar, þar sem eigendur þeirra hafa ekki sinnt tilmælum nefndarinnar".

Þeir bíleigendur sem eiga hér hlut að máli, mega því búast við að bílar þeirra verði fjarlægðir af sveitarfélaginu á næstu dögum og vikum og geymdir í porti Sorpsalagsins. Vonandi kemur ekki til þess og eru bíleigendur hvattir til að hafa samband við sveitarstjóra eða starfsmenn Sorpsamlagsins sem fyrst.

Kveðja
Þorgeir Pálsson
oddviti

Kæru íbúar Strandabyggðar,

Eins og þið hafið án efa orðið vör við, hófst malbikun í dag og er það vissulega gleðiefni, þó ekki náist að malbika allt sem til stóð á þessu ári.  Aukinn kostnaður við grunnskólann varð þess valdandi að vissum malbikunarframkvæmdum var frestað.

En, í þessari törn verður afar lélegur kafli á Kópnesbraut malbikaður.  Einnig verður Miðtúnið mablikað sem og Vitabrautin upp með ráðhúsinu, en sá kafli var farinn að skemmast.  Þá verður haldið áfram að malbika á Skeiði, þar sem fyrirhugað er að byggja upp aukna þjónustu við bíleigendur.

Malbikun á Skjaldbökuslóð frestast og hugsanlega verður farið í að kalla eftir hugmyndum um hönnun Skjaldbökuslóðar og nærumhverfis.  Einnig er til umræðu að fara í hugmyndasamkeppni um hönnun og skipulag á Plássinu.  

Allt miðar þetta að því að byggja samfélagið okkar upp og bæta innviðina.

Óhjákvæmilega þarf að loka fyrir umferð þar sem verið er að malbika hverju sinni og vonum við að íbúar sýni því skilning.

Kveðja
Þorgeir Pálsson
oddviti

Strandabyggð óskar eftir fallegum ljósmyndum sem og myndskeiðum sem sveitarfélagið má nota til birtinga á vef sveitarfélagsins ásamt öðrum miðlum sem kynningar- og fréttaefni. 

Ef þú átt myndir eða vilt taka myndir og/eða myndskeið og veita Strandabyggð leyfi til birtingar máttu senda tölvupóst á strandabyggd@strandabyggd.is fyrir nánari upplýsingar.

Vindorkugarður í Garpsdal – Virtual Room / Stafrænt herbergi.

Á meðan umsagnarferli stendur yfir geta hagsmunaaðilar kynnt sér verkefnið og niðurstöður umhverfismats í svo kölluðu Virtual Room sem er í líki þrívíðs samkomusalar þar sem hægt er að skoða efni umhverfismatsins.

Virtual Room er hluti af samráðsferli EM Orku og vonumst við til að það skapi umræðu með því að veita hagsmunaaðilum upplýsingar á miðli sem auðvelt og þægilegt er að nota.

Herbergið verður aðgengilegt frá heimasíðu EM Orku (www.emorka.is) frá mánudeginum 8. júlí og þar til umsagnarfrestur rennur út þann 19. ágúst.

 

Fjarfundarkynning (Webinar)  á Zoom þann 11. júlí kl 13

Fyrir þá sem sáu sér ekki fært að mæta á opnu kynninguna í Krókfjarðanesi verður kynningin flutt aftur með fjarfundartækni og verður hlekkur aðgengilegur frá heimasíðu EM Orku (www.emorka.is) að morgni fimmtudagsins 11. Júlí.

Fyrir hönd EM Orku,

Ríkarður Ragnarsson Verkefnastjóri