Á Hamingjudögum í sumar hófst söfnun fyrir ærslabelg því eins og allir vita mun slíkur hoppbelgur veita mörgum ómælda hamingju. 

Stjórn Sparisjóðs Strandamanna ákvað nú í desember að styrkja söfnunina um kr. 170.000 og viljum við þakka kærlega fyrir þeirra rausnarlega framlag.

Einnig barst framlag frá einstaklingi kr. 60 þúsund í október og við þökkum kærlega fyrir það rausnarlega framlag.

Söfnunin heldur áfram og viljum við hvetja fyrirtæki og stofnanir til að leggja sitt af mörkum.  Nú er til í sjóðnum tæpar 340 þúsund krónur.
Tekið verður við frjálsum framlögum á reikning í Sparisjóði Strandamanna 1161-15-202018 kt. 570806-0410. 

Kæru íbúar Strandabyggðar,

 

Ég óska ykkur gleðilegrar hátíðar og vona að þið hafið haft það gott um jólin.  Það er einhvern veginn svo, að jólin koma oft aftan að manni, þó svo aðdragandinn sé alltaf sá sami.  Manni líður eins og „allt“ sé eftir og óskar þess jafnvel að eiga eina viku í viðbót í undirbúning.  En svo koma jólin og þá smellur þetta allt saman, enda á undirbúningurinn jú að fara fram í hjartanu og sálinni, en ekki bara með kúst og tusku í hendi.

 

Það er nýtt ár framundan með nýjum áskorunum.  Heyútflutningurinn nú um jólin ýtti við manni og það frábæra framtak sýnir að það eru tækifæri víða.  Bændur eiga hrós skilið fyrir framtakið og framkvæmdina. Þetta sýnir okkur líka að við þurfum að leita tækifæra víða; í landbúnaði, í ferðaþjónustu, í handverki og öðrum iðnaði sem skapar verðmæti og veitir góða þjónustu.  Atvinnusköpun má ekki vera bundin við of fáa staði eða atvinnurekendur, því þá eykst áhættan fyrir samfélagið.  Viðkvæm staða Hólmadrangs er góð áminning um það, þó svo við reiknum með og vonum að sú staða breytist til batnaðar.  Við þurfum því að hugsa út fyrir hefðbundna ramma og leita markvisst að nýjum tækifærum.  Sú leit gæti orðið áberandi á nýju ári.

 

Við erum þjónustusamfélag.  Strandabyggð er mikilvægur þjónustukjarni og ef við skoðum það sem boðið er upp á í okkar sveitarfélagi, þá getum við verið stolt og sátt, því hér er margt í boði og hátt þjónustustig.  Heilsugæslan, Vegagerðin, Orkubúið, Kaupfélagið, Sparisjóðurinn, Pósturinn, Sýslumaðurinn, Lögreglan, sveitarfélagið, Íþróttamiðstöðin (sundlaug og tækjasalur), Grunnskólinn, Leikskólinn, Tónskólinn, Félagsheimilið, tjaldstæðið, hárgreiðslustofa, bifvélaverkstæði, útgerðarfyrirtæki, landbúnaður, matvælaframleiðsla bæði landbúnaðarvörur og sjávarafurðir, veitingastaðir, hótel, gistiheimili, sorpsamlag, flokkunarstöð, slökkvilið, verktakar í vegagerð og jarðvinnu hvers konar, kirkja og útfararþjónusta, afþreyingarfyrirtæki, leikfélag, söfn, tveir kórar, fjöldi fjölbreyttra einstaklingsfyrirtækja og svona mætti lengi telja.  Það er hins vegar ekki sjálfgefið að halda þessum langa lista úti og við megum við litlu þegar kemur að því að skapa og halda atvinnu og fólki í sveitarfélaginu.  Nýtt ár kallar á enn frekari samstöðu um að viðhalda þessari stöðu og berjast fyrir því sem við höfum.

 

Á fyrstu dögum nýs árs kemur á heimasíðu Strandabyggðar starfsáætlun Sveitarstjórnar 2019 og ég hvet ykkur til að kynna ykkur hana og þær aðgerðir sem fyrirhugaðar eru á næstu árum. 

 

Kæru íbúar Strandabyggðar. Tökum nýju ári fagnandi og verum bjartsýn á framtíðina.  Hún er að miklu leyti í okkar höndum.

 

Gleðilega hátíð!

 

Þorgeir Pálsson

Lokað verður á skrifstofu Strandabyggðar á aðfangadag og gamlársdag en að öðru leiti er venjubundin opnun frá kl. 10-14. 

Við minnum einnig á að hægt er að skoða sýninguna "Skessur sem éta karla" þegar skrifstofan er opin en þessi glæsilega sýning með textum eftir Dagrúnu Jónsdóttur og teikningum Sunnevu Þórðardóttur verður til sýnis út janúar.

Kæru íbúar,

Eins og þið hafið án efa tekið eftir, er verið að undirbúa útskipun á heyi.  Hér er um að ræða sölu á heyi til Noregs og fögnum við þessu framtaki mjög.  Það er gott að bændur hér í Strandabyggð geti nýtt þetta tækifæri og komið sínu heyi á markað.  Þann 21. desember n.k. kemur svo hingað skip að sækja ca 2000-2400 rúllur af heyi.

 

Auglýst er eftir tilnefningum  um íþróttamann ársins 2018 í Strandabyggð. Senda skal tilnefningar og stuttan rökstuðning á netfangið adalbjorg@strandabyggd.is eigi síðar en 6. janúar. Allir mega senda inn tilnefningu og frjálst er að nefna fleiri en einn aðila en viðkomandi þurfa að hafa haft lögheimili í Strandabyggð á síðastliðnu ári. Samkvæmt reglugerð um útnefningu á íþróttamanni ársins hefur Tómstunda- íþrótta- og menningarnefnd umsjón með valinu á ári hverju.  Upplýst verður um valið á íþróttahátíð og lýheilsuhátíð Grunnskólans á Hólmavík mánudaginn 17. janúar 2019....
Meira